KULINDELEKE ukuba siqhubeke nokwanda isibalo sabantu abafe esibhicongweni sokuwa kwesakhiwo seThempeli elakhiwayo eRedCliff, eVerulam, ngoLwesihlanu.
Inkampani ezimele yonogada iReaction Unit South Africa ithi ibizwe endaweni yesigameko ngezikhathi zasemini lapho ifice khona kudilike lesi sakhiwo esiyizitezi ezine, esiwele phezu kwabantu abebesebenza kusona. Ukutakula kumisiwe izolo ngoMgqibelo, ngenxa yesimo sezulu esingesihle, njengoba kuze kwaqhutshekwa namuhla ngeSonto.
UNdunankulu waKwaZulu-Natal uMnu Thami Ntuli noNgqongqoshe wezokuBusa ngokuBambisana nezoMdabu esifundazweni uMnu Thulasizwe Buthelezi bebehambele kule ndawo ukuyohlola umonakalo, lapho befice abotakulo besakhipha isidumbu sesisulu sesihlanu.
“Umbiko engiwutholayo ngowokuthi izidumbu zokuqala ezine ngezabantu baseNingizimu Afrika. Lesi sesihlanu yima sisazohlonzwa uma sesikhishiwe. Izinhlekelele sekuyinto evamayo esifundazweni zethu, kodwa kulokhu okudabukisa kakhulu wukuthi senzeke endaweni yokukhonzela,” esho.
Uthe unethemba lokuthi uphenyo luzoveza ukuthi ngabe kube yingozi ngempela le noma kube nobudedengu njengoba kwakhiwa. Onjiniyela abasebenza laphaya, uthe kuzobhekwa ukuthi bawulungele yini umsebenzi wabo nokuthi bawenze ngendlela yini.
“Mhlawumbe leli yithuba lokuthi siphume umkhankaso wokubheka zonke izindlu nezakhiwo eziyizitezi esifundazweni, ukuthi ngabe zigunyaziwe yini ngonjiniyela. Asifisi ukuphinde sibone kwenzeka into efana nalena esikhathini esizayo,” kusho uNtuli.
